Во организација на Културно-информативниот центар на Р. Македонија и КИЦ од Скопје, на 8 септември во 18:30 часот, во просториите на КИЦ беше отворена изложбата на современиот македонски сликар Александар Јанкуловски-Цане. Изложбата ја отвори преставник на КИЦ-Скопје, Емил Шулајковски.
Александар Јанкуловски е роден 1936 год. во Прилеп. Завршил Уметничкото училиште, а дипломирал на Факултетот за ликовни уметности при Универзитетот “Св. Кирил и Методиј“, оддел сликарство.
Карактеристично за сликарството на Јанкуловски уште на самиот почеток, е фактот што тој ги отфрла сите дотогашни стандарни стилови во сликарството, започнувајќи да гради слики со несликарски материјали: бакар, градежни вреќи, пилевина, пепел, огледало, боја..., и останати материјали - дотогаш незастапени во сликарството во Македонија.
Јанкуловски има над петнаесеттина самостојни изложби, изложувајќи самостојно и групно во Македонија, на ексјугословенските простори, Европа и светот.
Учесник и раководител на ликовни колонии во Македонија и Европа. За своето творештво, добитник е на бројни награди и високи општествени признанија.
