Во време кога културата станува сѐ поважна алатка за поврзување на народите, а уметноста мост кој ги надминува границите, со голема чест и чувство на одговорност ја споделуваме веста за потпишувањето на Меморандум за соработка помеѓу Македонскиот културно-информативен центар во Софија и Националната установа Драмски театар Скопје.
Овој чин се случува во симболичен и значаен момент – одбележувањето на 20-годишнината од основањето на Македонскиот КИЦ во Софија. Дваесет години посветена работа, афирмација на македонскиот културен идентитет и неуморно претставување на уметничките достигнувања пред бугарската и меѓународната јавност, создадоа стабилна основа врз која денес се гради ново партнерство.
Меморандумот, потпишан од моја страна како директор на Македонскиот КИЦ и дипломатски советник, и од страна на г. Роберт Велјановски, директор на НУ Драмски театар Скопје, отвора ново поглавје во културната соработка меѓу двете институции. Преку овој документ, се воспоставува јасна рамка за интензивна и конкретна соработка во наредните две години, во која Македонскиот КИЦ ќе даде целосна поддршка за настапи на Драмскиот театар во Софија, како и за гостувања на оваа реномирана институција на други културни сцени во Република Бугарија.
Со овој потег не само што се продлабочува институционалната соработка, туку и се создава простор за жив дијалог помеѓу македонските уметници и публиката надвор од границите на нашата земја. Македонскиот културно-информативен центар во Софија отсекогаш бил и останува мисионер во промоцијата на македонската култура – без разлика дали станува збор за драмска, музичка, книжевна или филмска продукција, или за други форми на современ и традиционален уметнички израз.
Со секој нов проект, настап и презентација, го потврдуваме нашето уверување дека културата е моќна сила што обединува. Преку сцената на Драмскиот театар, преку зборот, движењето и емоцијата, нашите уметници ќе зборуваат на универзален јазик што допира до секој човек.
Во рамките на свечениот настан, на директорот на НУ Драмски театар Скопје, г. Роберт Велјановски, му беше врачена благодарница „Мостови на културата“ - признание за неговата долгогодишна и неуморна заложба во интернационализацијата на македонската театарска уметност и нејзиното претставување на европската културна мапа.
Ова признание претставува и јасна порака дека Македонскиот КИЦ во Софија е цврсто определен да продолжи со иницијативи кои ќе ја збогатуваат културната соработка помеѓу Македонија и Бугарија, но и пошироко, ставајќи ги македонските уметници и нивните дела во срцето на нашите напори.
Веруваме дека оваа нова соработка ќе биде само почеток на едно продлабочено пријателство, инспирирано од вредностите на отвореност, почитување и културна размена. Сигурни сме дека сцената во Софија ќе стане дом на многу македонски театарски претстави, а публиката – нивен верен следбеник.
Со љубов кон културата и визија за заедничка иднина, продолжуваме да ги градиме мостовите што не поврзуваат.
