На 13 март во галеријата на КИЦ во Софија беше отворена самостојната ликовна изложба на младата сликарка Марта Патлиџанковска.
Присутните гости ги поздравија Н.Е. Агнеза Руси-Поповска, амбасадор на РС Македонија во Бугарија, и проф. д-р Зоран Пејковски, директор на КИЦ во Софија, кој истакна:
Почитувани гости со вечерашнава изложба почнуваме со реализација на културните проекти за 2025 година, и ве уверувам дека ќе бидат бројни и разновидни и интересни, така што ќе имате можност да видите и да бидете дел од бројните културни настани на Македонскиот Културно-информативен центар.
Што се однесува до вечерашната изложбата на Марта Патлиџанковска „Моменти“ таа ја нуди можноста за поглед во уметничката експресија на една од најмладите и најперспективни уметници на денешницата. Со своите дела, Патлиџанковска го продолжува својот пат како успешна уметничка која набрзо станува член на ДЛУМ и има освоено многу награди и признанија, покажувајќи впечатливи резултати во својата уметничка кариера.
Марта, родена во 1999 година, дипломира на Факултетот за ликовни уметности и веднаш по дипломирањето започнува активно да учествува на значајни изложби, како што се групните изложби и нејзините самостојни проекти, меѓу кои и „Портрети“ и „Уживање“ во 2023 и 2024 година. Нејзината работа е препознатлива по користењето на интензивни бои и изразита импулсивност во техниката, која, со своите контрасти и динамичност, ја носи силната емоција и личен печат на уметничките дела.
Мотивите што ги обработува се разновидни, но особено силно присутни се портретите и мачките (а на вечерашната изложба ги имаме мачките), кои стануваат симболи на нејзината визуелна експресија. Користењето на комбинирана техника и храбрата употреба на боите ја прават изложбата визуелно и емоционално динамична. Силните, груби потези со четката и техниката на создавање слоеви ја изразуваат нејзината желба за континуирана истражувачка работа во светот на боите и формите.
Во светот на Марта Патлиџанковска, секој момент претставува уникатна шанса за доживување и размислување, што се надоврзува на темата на нејзината изложба, која ги предизвикува гледачите да се впуштат во нејзиниот визуелен свет и да ја доживеат истата сила и енергија која таа ја вложува во секое дело.
Со голема радост ја прогласувам изложбата за отворена! Уживајте во нејзините „Моменти“.
