Културно-информативниот центар на Северна Македонија, на 31 јули 2023 година, беше посетен од г-н Петар Стојанов, претседател на Република Бугарија во периодот 1997 – 2002 година, тој беше пречекан од директорот на македонскиот КИЦ во Софија д-р Сашко Насев и амбасадорката на нашата земја во Бугарија Н.Е. Агнеза Руси-Поповска. Во искрен, пријателски разговор и атмосфера претседателот Стојанов покажа особен интерес за културните врски меѓу Скопје и Софија. На пријателската средба во просториите на Центарот присуствуваа и Елисавета Шапкарева и Рајна Дрангова, кои се претставници на македонските родови во Бугарија.
Гостите имаа прилика да ја разгледаат изложбата на македонската уметница од Прилеп Александра Богоеска и да се запознаат со некои од содржините во библиотеката на нашиот Центар. На претседателот Петар Стојанов му беше врачен и личен подарок – уметничка графика од уметникот и организатор на културни настани во КИЦ на РСМ во Софија Иво Пецов.
