На 27 март 2025 во галеријата на КИЦ во Софија се одржа концертот „Балканско патување“ на музичкиот квартет на Пламенка Трајковска.
Вечерта започна со едноминутен молк, со што присутните го изразија своето сочувство до семејствата на жртвите и повредените во страшната трагедија во Кочани на 16 март, по што се обрати директорот, проф. д-р Зоран Пејкивски со зборовите:
„Се разбира сакам да упатам благодарност до сите кои ни излегоа во пресрет при згрижување на повредените во нивните болници. А тоа го направи и Република Бугарија.
Сега, добредојдовте на отворањето на нашиот музички проект „Балканско патување“, кој е дело на гудачкиот квартет на Пламенка Трајковска. Вечерва имаме чест да се насладуваме на виртуозноста на Пламенка Трајковска на виолина, Милена Гиевска-Андоновска на виолина, Љубица Бошкоска на виола и Александра Јаневска на виолончело. Аранжманите, кои ќе ги слушнете, се плод на креативната визија на Пламенка Трајковска.
„Балканско патување“ е уникатен музичко - истражувачки проект, кој ги истражува заедничките корени на балканските музички традиции. Вечерва ќе ја откриеме богатата музичка ризница на нашиот регион и ќе се впуштиме во мелодиските и ритмичките елементи кои ги поврзуваат народите на Балканот.
Така што ќе чуете комбинира класична музика со специфични музички обележја од различни региони. На тој начин, тие создаваат композиции кои не само што ги слават традициите, туку и ги поврзуваат, пренесувајќи ни спомени и емоции од минатото.
На крајот да истакнам дека овој концерт е предизвик и покана за сите вас - да се нурнете во богатството на балканската музика, да ја почувствувате историјата и културата на нашите народи преку звуците на гудачкиот квартет.
Се надевам дека ќе уживате во ова патување и ќе го почувствувате духот на Балканот.
Ви благодарам!“
По обраќањето на директорот на КИЦ во Софија, кон присутните се обрати и амбасадорката на РС Македонија во Софија Н. Е. Агнеза Руси-Поповска, а потоа следеше концертот на квартетот кој заврши со бурни аплаузи и изразено задоволство од присутните.
На концертот „Балканско патување“ присуствуваа и претставници од странски културни центри и амбасади во Софија.
