Во организација на Културно-Информативниот Центар на Р.Македонија во соработка со Домот на културата "Лазар Софијанов" од Кратово на 15 ноември во 18:30 часот во галерискиот простор на КИЦ беше отворена ретроспективна изложба со цртежи и слики, инспирирани од старата архитектура на градот Кратово. Изложбата беше отворена од директорите на КИЦ на Р.Македонија во Софија и Домот на културата во Кратово, г-н Васко Шутаров и г-н Живко Крстевски.
Традиционалната Детска ликовна колонија посветена на оваа тема, се одржува секоја година во организација на Домот на културата "Лазар Софијанов" од Кратово, а во неа учествуваат ученици од бројни училишта во Р.Македонија но и ученици од Р.Бугарија и Р.Србија. Неисцрпна инспирација за младите ликовни уметници се старите кратовски кули, мостови, чешми, куќи...
